Археалагічны музей «Бярэсце»

Археалагічны музей «Бярэсце» — філіял Брэсцкага абласнога краязнаўчага музея. У 1969–81 і 1988 на месцы даўняга горада супрацоўнікамі аддзела археалогіі Інстытута гісторыі Акадэміі Навук БССР праводзіліся раскопкі пад кіраўніцтвам доктара гістарычных навук П.Ф. Лысенкі. Былі выяўлены дзесяткі драўляных пабудоў XI–XIII стст., вулічныя маставыя, агароджы, шматлікія прадметы матэрыяльнай культуры таго часу. Агульная пл. раскопак дасягнула 1800 м2. Высокая канцэнтрацыя на параўнальна невялікай тэрыторыі добра захаваных пабудоў дазволіла стварыць унікальны музей. Узведзены спецыяльны павільён з бетону, шкла і анадзіраванага алюмінія памерам 40х60 м з выгляду нагадвае старажытнае жытло і пласты зямлі, якія «адкрываюць» тагачасны горад. У 14 залах-нішах прадстаўлены раздзелы: узнікненне і гісторыя старажытнага Бярэсця, планіроўка і забудова горада, рамёствы — апрацоўка жалеза і каляровых металаў, кастарэзнае і гарбарнае рамёствы, прадзенне і ткацтва, ганчарства і дрэваапрацоўка; земляробства, жывёлагадоўля, паляванне і рыбалоўства, гандаль, культура; рэканструкцыя жытла берасцяніна (XIII ст.), гісторыя даследавання Бярэсця. Асновай экспазіцыі музея з'яўляецца раскоп. На глыбіні 4 м знаходзіцца частка рамесніцкага квартала — 28 драўляных жылых і гаспадарчых пабудоў XIII ст., 2 вулічныя маставыя, частакол, рэшткі глінабітных печак. Культурны пласт таўшчынёй да 7 м і высокая вільготнасць дазволілі захаваць многія з пабудоў на 5–9 вянцоў, некаторыя нават на 12 вянцоў, што з'яўляецца вялікай рэдкасцю.

Музеі Беларусі: даведачнае выданне/рэд. Г.П. Пашкоў, Л.В. Календа, М.Г. Нікіцін. — Мінск, 2008. — 260 с.

Дадатковыя крыніцы аб музеі:

Археалагічны музей «Бярэсце». Ekskursii.by